АГРОБИОЦЕНОЗ

АГРОБИОЦЕНОЗ (агро..., bios ‒ жашоо, koinos ‒ жалпы) ‒ айыл чарба азык-түлүктөрүн өндүрүү шартында түзүлүп, жөнгө салынып туруучу өсүмдүк, жаныбар жана микроорганизмдер жамааты. Ал өзү калыбына келүүгө жөндөмсүз жана экологиялык өзгөрүүлөргө чыдамсыз келет; бул жерде түшүмдүүлүк кыйла жогору болот. Себеби адам айдаган өсүмдүккө жагымдуу шарт түзүү менен башка түрдүн өсүшүн басаӊдатат. Агробиоценоз негизинен агрофитоценоздон — агротехникалык чаралардын негизинде түзүлгөн өсүмдүктөрдөн жана зыянкеч курт-кумурскалардан турат. Табигый өсүмдүктөр өскөн жерлерге маданий өсүмдүктөрдүн бир эле түрүн эгүү анын зооценозунун кескин өзгөрүшүнө да алып келет. Өсүмдүктөр өскөн жерди иштетүүгө чыдабаган жаныбарлар жок болуп кетет, айрымдары үчүн (негизинен фитофаг ‒ курт-кумурскалар) жагымдуу шарт түзүлүп, алар көбөйүп, эгилген өсүмдүктөргө зыян келтирет.