АНГОЛА-КОНГО АЛМАЗ ПРОВИНЦИЯСЫ
АНГОЛА - КОНГО АЛМАЗ ПРОВИНЦИЯСЫ–алмаздын запасы жана казып алынуусу б-ча дүйнөдөгү кенташтуу (рудалуу) ири аймактардын бири. Ангола Респ-сынын жана Конго Демокр.Респ-сынын аймагында жайгашкан. Дүйнөдөгү алмаздын 1/4 бөлүгү ушул аймактан казылып алынат. Аянты 140 миң км2 . Суммардык ресурсу (млн карат): алмаз кен чачындысыныкы 150 (Ангола) жана 100 (Конго), алгачкы кендериники 580 (Ангола) жана 250 (Конго). 1907-ж. Касан д-нын өрөөнүндө чачынды табылып, 1913-жылдан ачык казып алынат. Мындагы алмаз бор мезгилинде пайда болгон кимберлит интрузиясы менен байланышкан. Алар негизинен провинциянын түш.-чыгыш чеги б-ча өз-өзүнчө бөлүнгөн аймактарды пайда кылган. Анголада 7 кимберлит аймагы (аларда 800дөн ашуун түтүк, анын ичинде эң ири Камафука-Камазамбо, Катока түтүктөрү), Конгодо – бирөө (15тей түтүк) бар. Алмазды казып алуу негизинен анын чачынды кендеринен – антропогендик борпоң тоо тектеринен (кум менен шагылдан (зергерлик алмаздын 65–85% алынат), андан башка бор мезгилинин конгломераттарындагы жана кимберлиттердеги байыркы кен чачындыларынан казып алынат. Мында казып алуу адеп башталгандан тартып бардыгы 1 млрд карат, анын ичинде Анголанын чачынды кендеринен 60 млн карат алмаз өндүрүлгөн.