АНГЛИЯ-БУР СОГУШУ

АНГЛИЯ-БУР СОГУШУ-- т ү ш т ү к а ф р и к а л ы к с о г у ш т а р (1899–1902) – Улуу Британиянын Түш. Африка (Трансвааль) жана Эркин Оранжевая Бур республикаларына каршы согушу. Англия алтын кендерине бай Трансваалды каратууну жана Кейптаундан Каирге чейинки аймакка үстөмдүгүн орнотууну көздөгөн. Бур республикаларында жашоочу англ. уитлендерге (Бур республикаларына келип отурукташкан колонистер) шайлоо укугун берүү ж-дөгү Англиянын талабын Трансвааль президенти Крюгердин четке кагышы согуштун чыгышына шылтоо болгон. Бурлар (европалык – голландиялык, франциялык жана немец колониячыларынын тукумдары) куралдарынын, тактикасынын артыкчылыгы менен адегенде бир катар жеңишке жетишип, кийин баскынчыларга каршы партизан согушуна өткөн. 1900-ж. сан жагынан артыкчылык кылышкан англичандар Оранжевая республикасынын борбору Блумфонтейнди, ал эми июнда Трансваалдын борб. Преторияны ээлешкен. 1902-ж. 31-майда Преторияда тынчтык келишими түзүлүп, ал б-ча Трансвааль жана Оранжевая республикалары Англиянын колониясына айланган. Англия Түш. Африкадагы абалын бекемдөө максатында бурлар менен африкалыктарга каршы биримдик түзүү үчүн Түш. Африка Союзун түзөт. 1910-ж. Бур республикаларынын жерлери Түш. Африка Союзунун курамына кирген.