АГРЕССИВДҮҮ СУУ

АГРЕССИВДҮҮ СУУ ‒ металл, бетон ж. б. материалдарга хим. терс таасирин тийгизүүчү жер астындагы суу. Курамында ар түркүн аммоний туздарын, туз, күкүрт ж. б. к-таларды камтыйт, өзгөчө агрессивдүүлүккө ээ. Мындай суулардын курамындагы туздардын хим. таасиринен бетондун сапаты начарлап, акырындык менен бузулат. А. с. жер бетинен 0,2 мден төмөнкү ар кандай тереӊдикте болот. Алар жалпы к-талуу, сульфаттуу, магнезиялуу жана көмүр к-талуу болуп бөлүнөт. Суунун агрессивдүүлүгү анын хим. курамына атайын инструкциянын талаптарына салыштыруу менен аныкталат. Ошондуктан жер бетинен кандайдыр бир тереӊдикте жайгашуучу имараттардын фундаменттерин, гидротех. курулуштар менен коммуникацияларды, суу түтүктөрүн ж. б-ды курууда ошол тереӊдиктен учураган суунун агрессивдүүлүгүн аныктап, ага каршы алдын ала тийиштүү чараларды көрүү талап кылынат. О. эле хим. жер семирткичтер колдонулган талаалар аркылуу аккан азоттун жана күкүрттүн бирикмелери менен каныккан атм-лык нымды (кислоталуу жаан-чачын) сиӊирген суу да агрессивдүүлүккө ээ. Өтө А. с-лар организмдердин тиричилигине коркунуч туудурат.