АБДЫКАДЫРОВ Жалил

АБДЫКАДЫРОВ Жалил (1932, Ысык-Көл обл., Жети-Өгүз р-ну, Чырак айылы – 1986, Бишкек) – режиссёр, коомдук ишмер, Кыргыз ССРинин искусствого эмгек сиңирген ишмери (1964), Кыргыз ССРинин Токтогул атындагы мамлекеттик сыйлыгынын лауреаты (1986). 1946-ж. Каракол пед. окуу жайын, 1954-ж. Ташкенттеги А. Н. Островский атындагы театр институтунун режиссёрдук факультетин бүткөн. 195460-ж. Ысык-Көл обл. драма театрында башкы режиссёр,1959-73-ж. Кыргыз мамл.

академиялык драма театрында башкы режиссёр, режиссёр-коюучу, 1973–77-ж. Кыргыз телекөрсөтүү ж-а радиоуктуруу комитетинин адабий-драмалык редакциясынын башкы редактору, 1977–80-ж. Нарын музыкалык драма театрында, 1982-84-ж. Кыргыз мамлекеттик академиялык драма театрында режиссёр-коюучу болуп иштеген. А. орус, батыш классиктеринин ж-а кыргыз жазуучуларынын чыгармаларын театрлаштырган: М. Горькийдин («Васса Железнова»), Я. Галандын («Таң алдындагы сүйүү»), Н. Хикметтин («Унутулган адам»), А. Токомбаевдин («Өлбөстүн үрөнү»), Ч. Айтматовдун («Бетме-бет», «Биринчи мугалим», «Жамийла»), Т. Абдумомуновдун («Ашырбай», «Сүйүү жана үмүт»), Ш. Садыбакасовдун («Ак боз ат»), Ж. Абдыкадыровдун («Олжобай менен Кишимжан»), С. Ахмаджан («Келиндер козголоңу») ж. б. 80ден ашык чыгарманы республиканын театрларында койгон. Айрыкча Б. Жакиевдин «Атанын тагдыры» (1965), У. Шекспирдин «Король Лир» (1965), Ж. Садыковдун «Манастын уулу Семетей» (1982) драмалары Москвада көрсөтүлүп, жогору бааланышы А-дун элдик, эпикалык көркөм өнөрдүн салттарын терең чагылдыра билгендигин, режиссёр катары кайталангыс өзүнчөлүгүн далилдейт. Ал бир нече пьеса, аңгеме, ырлардын автору ж-а анын көптөгөн адабий котормолору бар. Медалдар м-н сыйланган.