АБДУКАРИМОВ Мамасалы

АБДУКАРИМОВ Мамасалы (5. 6.1910, Ош обл., Кара-Суу р-ну, Жапалак айылы - 26. 1. 1996, Бишкек) – кыргыз жазма адабиятын баштоочулардын бири, жазуучу ж-a котормочу, Кыргыз эл жазуучусу (1995). 1924–25-ж. Ташкенттеги Казак-кыргыз институтунда билим алган. 1930-ж. Кыргыз педтехникумун бүтүргөн. Эмгек жолун республикалык «Ленинчил жаш» гезитинде жооптуу секретарь болуп иштөөдөн баштап, 1938-40-ж. анын жооптуу редактору, «Кызыл Кыргызстан» гезитинде жооптуу секретарь, редактордун орун басары, 1943–47-ж. Кыргызстан КП Ош обкомунун катчысы, 1950-57-ж. Кыргызмамбаста бөлүм башчы,1957–68-ж. «Советтик Кыргызстан»

гезитинде адабий кызматкер болуп эмгектенген. Анын «Курмушунун турмушу» аттуу алгачкы аңгемеси 1928-ж. жарык көргөн. А. «Кызыл эмгек», «Турмуш жана күрөш» (1937), «Үзүлбөгөн үмүт» (1957), «Болгар жеринде» (1960), «Эр жүрөк азаматтарды даңазалап ырдайбыз» (1986) жыйнактарынын, «Жаңырык», «Жашагым келет» романдарынын (1-китеби, 1965), биографиялык мүнөздөгү «Жол башы» (1982), «Биринчи кубаныч» документалдуу повестинин, «Эркин-Тоо» элге» (1995) аттуу тарыхый очерктин автору. Жазуучунун калеминен жаралган чыгармалардан ошол учурдун илеби, бакыт үчүн, жыргалдуу турмуш үчүн баатырларча күрөшкөн чыныгы адамдын үмүт-тилеги сезилип турат. А. 4–10-класстар үчүн «Кыргыз адабияты» окуу куралынын түзүүчүлөрүнөн. Көрүнүктүү котормочу катары да белгилүү. Ал ар түрдүү тармактагы адабияттарды, орус жана дүйнөлүк классиктер А. П. Чехов, М. Горький, М. Шолохов, Джон Рид ж. б-дын көркөм чыгармаларын, ондогон киносценарийлерди кыргыз тилине которгон. «Ардак Белгиси» ордени жана медалдар менен сыйланган.
Ад.: Артыкбаев К. Жазуучу, журналист жана котормочу. «Ала-Тоо», 1960, № 9; Писатели Советского Киргизстана. Ф., 1989. Ж. Медералиева.