АТЫРАУ

‒ Казакстандын батышындагы шаар. Атырау обл-нун адм. борбору. Калкы 217,3 миӊ (2013). Урал д-нын боюнда жайгашкан. 1640-ж. Яик д-нын (1775-жылдан Урал) чатында негизделген. Казактар «Уйшiк», орустар ‒ Төмөнкү Яик таш шаарчасы деп аташкан. 1734-ж. Гурьев деп аталган. 1810-ж. чеп жоюлган. 1868-ж. Россия империясынын Урал обл-ндагы, 1924‒28-ж. Урал губерниясындагы (РСФСРдын курамындагы Кыргыз, 1925-жылдан Казак АССРиндеги) шаар. 1928‒30-ж. Гурьев округунун, 1932‒38-ж. Батыш Казакстан обл-нун, 1938-жылдын 15-январынан Гурьев обл-нун адм. борбору; 1992-жылдан Атырау. Ун-т, нефть жана газ ин-ту, Казак драма театры (1938-жылдан) бар. Заводдору: нефть ажыратуу, хим. (полимер материалдар өндүрүшү), курулуш материалдар, тамак-аш (анын ичинде балык иштетүү жана көбөйтүү).