АК-СУУ (ЖАР-ТАШ) МИНЕРАЛДУУ СУУСУ

АК-СУУ (ЖАР-ТАШ) МИНЕРАЛДУУ СУУСУ‒  дарыланууга ж-а ичүүгө жарамдуу суу булактары. Чүй обл-нун Жайыл р-нунда, Жар-Таш суусунун куйган жеринен 7 км жогору, Бишкек ш-нан 100 км түш.-батышта жайгашкан. 1960-ж. геол. изилдөө жүргүзүлүп, дарылык касиети аныкталган. Булактары ордовик мезгилинде пайда болгон кара түстүү сланец катмарларын аралап, тектон. жаракалар аркылуу жер үстүнө чыгат. Суу муздак (7‒14°С), тунук, чала кычкыл (рН 5,5‒5,9) келип, курамы гидрокарбонаттуу ж-а кальций-магнийлүү. Суунун негизги дарылык фактору ‒ натрий ж-а магний туздарын түзгөн гидрокарбонат иону. Анын суудагы өлчөмү 0,8‒1,5 г/л. Суу ашказан, боор, өт, ичеги-карын ооруларына даба болот. 1970-жылдан суусундук катары ичүүгө сатыкка чыгарылган. Запасы А+В+С1 ‒ 0,247 миӊ м3/суткасына.