АСПЕРГИЛЛЕЗ

 (Aspergillosis) ‒ куш ж-а мал ылаӊы; чанда кишинин жугуштуу оорусу. Мында тери, дем алуу органдары, ичеги-карын, былжыр челдер сезгенет. Козгогучу‒кебер козу карынынын кээ бир түрлөрү (Aspergillus fumigatus, кээде А. flavus ж-а А. niger). Козгогуч дем алуу же тамак сиӊирүү органдары аркылуу кирет. Аны м-н куштун бардык түрү, көбүнчө жөжө, уй, жылкы, кой, чочко да ылаӊдайт. Ылаӊдын жашыруун мезгили 3‒10 күн. Катуу кармаганы (жөжөдө) ж-а өнөкөтү (кушта) болушу мүмкүн. Катуу кармаганда ылаӊдаган куш жем жебейт, суусайт, дем алуусу тездеп, кыйындайт, тердейт, мурдунан ж-а оозунан көбүктүү суюктук агат, канатын салбыратып, көзүн ачпайт, ичи өтүп, калтырайт. Өнөкөт А-до ушундай эле белгилер м-н узакка жабыркап, куш арыктап өлөт. Уйдун деми кыстыгып, көкүрөгү кыркырап, кургак жөткүрөт. Алдын алуу чаралары: жумуртканы кебер басуудан сактоо, кебер баскан жемди кушка бербөө, кеберлеген төшөлгөнү колдонбоо, кушкананы, шаймандарды маалы м-н тазалоо, желдетүү, дезинфекциялоо.