АК-СУУ Лейлек районундагы суу

АК-СУУ ‒ Лейлек районундагы суу, Сыр-Дарыянын сол куймасы. Узундугу 93 км, алабынын аянты 1170 км². Түркстан кырка тоосунун түндүк капталындагы Ай-Көлгө жакын жерден башталып, адегенде тереӊ жана кууш капчыгай аркылуу түштүк-батышты карай агып, андан кийин түндүктү көздөй бурулуп, Фергана өрөөнүнө чыгат. Жогорку агымы Зардалы деп аталат. Ири куймалары: Сумбула, Дакат-Суу ж. б. Майда кирип, июлда ташкындайт да, октябрда тартылат. Жылдык орточо чыгымы 3,81 м³/сек; эӊ көбү ‒ 13,6 м³/сек, эӊ азы ‒ 1,17 м³/сек. Сугатка пайдаланылат. Боюнда Андарак кыштагы, Нау шаары (Тажикстан) жайгашкан.