БУКАЛАЕВ Камчыбек Искакович

БУКАЛАЕВ Камчыбек Исхакович (11. 10. 1957-жылы туулган, Ысык-Көл облусу, Ысык-Көл району, Чырпыкты айылы) – обончу, Кыргыз Республикасынын эмгек сиңирген артисти (2016), Кыргыз Республикасынын эл артисти (2023).

Көбү Кыргыз телерадионун Алтын фондуна кирген, 100дөн ашык обондуу ырлардын автору К. И. Букалаев М. Абдраев атындагы Республикалык атайын орто музыкалык мектеп-интернатында, кийин №1 мектеп-интернатында окуган. 1976-жылы Фрунзедеги музыкалык педагогикалык окуу жайын, 1980-жылы Б. Бейшеналиева атындагы Кыргыз мамлекеттик искусство институтун аяктаган. Алгачкы обону – балдарга арналган «Ачык көңүл балдарбыз» (сөзү А. Кыдыровдуку) аттуу ыры болгон. 1980-жылы Чолпон-Ата шаарында элдик «Ак-куу» ыр-бий ансамблинде көркөм жетекчи болуп эмгектенип, Москва шаарындагы Эл чарбасынын жетишкендиктеринин көргөзмөсүндөгү (ВДНХ) музыкалык фестивалдарга (1981–1982), Грузиянын Тбилиси шаарындагы Бүткүл союздук кароо-сынакка (1983) катышкан. Франциядагы Эл аралык фольклор фестивалынын дипломанты (1985), Евпаториядагы балдардын эл аралык музыкалык фестивалынын (1989), Биринчи республикалык салттуу «Эл ичи – өнөр кенчи» сынагынын лауреаты.

2008-жыл – мектепке чейинки жана мектеп жашындагы балдар үчүн «Ачык көңүл балдарбыз» ырлар жыйнагы;

2015-жыл – жаңы балдар ырлары менен толукталган «Баканын ыры» балдар ырларынын экинчи жыйнагы;

2015-жыл – Т. Сатылганов атындагы Кыргыз улуттук филармониясында балдар ырларынын чоң концертине катышкан.

Аткарылып жүргөн чыгармалары

• «Ачык көңүл балдарбыз» (сөзү А. Кыдыровдуку);
• «Биздин класс» (сөзү А. Кыдыровдуку);
• «Биздин бакча гүл бачка» (сөзү А. Кыдыровдуку);
• «Алиппе» (сөзү А. Илипаевдики);
• «Баканын ыры» (сөзү А. Карасартовдуку);
• «Менин апам» (сөзү Н. Жаркынбаевдики);
• «Жаңы жыл» (сөзү Ж. Садыковдуку);
• «Ким сулуу» (сөзү К. Урманбетовдуку);
• «Жаш таланттар гимни» (сөзү К. Урманбетовдуку);
• «Атың жакшы Ысык-Көл» (сөзү М. Осмоновдуку);
• 
  «Кереметтүү көл кечи» (сөзү Т. Кожомбердиевдики);
• «Ысык-Көлгө суктануу» (сөзү Н. Сыдыковдуку);
• «Түнкү кайык» (сөзү А. Осмоновдуку);
• «Жалжалым ой» (сөзү А. Осмоновдуку);
• «Ыр десте» (сөзү К. Урманбетовдуку);
• «Булуттар» (сөзү К. Урманбетовдуку);
• «Эң аярым» (сөзү А. Кыдыровдуку);
• «Сага» (сөзү К. Иманалиевдики);
• «Кыйбасың» (сөзү Ө. Кулумбаевдики);
• «Энекеме» (сөзү Т. Акматованыкы);

1984-жыл – СССР Композиторлор союзунун Ардак грамотасы;

1985-жыл – Кыргыз Республикасынын Маданият министрлигинин диплому, СССР композиторлор союзунун 1-даражадагы диплому;

2007-жыл –республиканын маданият жана искусство тармагындагы сиңирген эмгеги үчүн Кыргыз Республикасынын Ардак грамотасы;

2010-жыл – Кыргыз Республикасынын Маданият жана маалымат министрлигинин «Маданияттын эң мыктысы» төш белгиси;

2011-жыл – «Ысык-Көл облусуна 80 жыл» медалы;

2013-жыл – Кыргыз Республикасынын Маданият жана илим министрлигинин Ардак грамотасы;

2013-жыл – Р. Отунбаеванын демилгеси менен өткөрүлгөн балдарга арналган 1-Республикалык кароо-сынагында «Жазды күтүү» ыры үчүн Гран-при;

2014-жыл – «Ысык-Көл районунун ардактуу атуулу» медалы;

Камчыбек Исхакович Букалаевдин музыкалык жана сахналык, уюштуруучулук жөндөмү, аккордеондо ойноо техникасы өтө жогору. Ал көп жылдар бою №69, №5 (Бишкек) окуу жайларында чыгармачылык менен жаш өспүрүмдөрдүн талантын өстүрүүгө чоң салымын кошуп келет.