АРАБАЕВ Чолпонкул Исаевич

АРАБАЕВ Чолпонкул Исаевич (17. 9. 1957-жылы туулган, Нарын облусу, Тянь-Шань району, Дөбөлү айылы) – юрист, юридика илимдеринин доктору (2005), профессор (2004). КР УИАнын корреспондент мүчөсү(2010), академиги (2021). КРдин эмгек сиңирген юристи. Юстициянын 3-класстагы мамлекеттик кеңешчиси, КМУнун юрид. факультетин (1983), Москвадагы СССР ИАнын мамлекет жана укук институтунун аспирантурасын (1990) бүтүргөн. 1983–87-жылдары КМУнун юридика факультетинде окутуучу, 1991–96-жылдары окутуучу, улук окутуучу, до­цент, кафедра башчысы, даярдоо бөлүмүнүн деканы, даярдоо борборунун директору, 1996–2002-жылдары КРдин юстиция министринин орун басары, 1-орун басары, КР Өкмөтүнүн аппаратында административдик-укук департаментинин башчысы, КР ЖКнын Мыйзам чыгаруу жыйынындагы КР Өкмөтүнүн ыйгарым укуктуу өкүлү, КРдин Премьер-министринин кеңешчиси, КР Өкмөтүнө караштуу миграция жана демография агентствосунун директору, 2002–03-жылдары КР ЖКнын Мыйзам чыгаруу жыйынындагы КР Президентинин ыйгарым укуктуу өкүлү, 2003–05-жылдары КМЮАнын ректору, 2005–06-жылдары КМЮА, КМУ жана КРСУда кафедра профессору, 2006–10-жылдары КРдин мамлекеттик кызмат иштери боюнча агенттигинин борбордук аймактык өкүлчүлүгүнүн башчысы (Чүй, Талас облустары жана Бишкек шаары б-ча) жана ошол эле мезгилде КМУ жана КРСУда кафедра профессору, 2010–12-жылдары КРдин мамл. кадр кызматынын директору, 2012–13-жылдары КМУда кафедра башчысы, 2013–17-жылдары КР УИАда башкы окумуштуу катчы, 2017–19-жылдары КР УИАнын социалдык-саясий изилдөө, философия жана укук институтунун мамлекеттик башкаруу жана саясий изилдөө, экспертиза бөлүмүнүн башчысы, башкы илимий кызматкер, 2019-жылдан КР УИАнын саясий изилдөө жана экспертиза борборунун директору, 2022-жылдан КР УИАнын вице-президенти. Конституция, жарандык, үй-бүлөлүк, жер жана агрардык укук, ошондой эле илимий-популярдык эмгектердин (анын ичинде 4 монография, 10 окуу жана окуу-усулдук колдонмо) автору. «Манас – 1000» медалы, КР ЖКнын Ардак грамотасы менен сыйланган.