АРМАН КҮҮЛӨР

АРМАН КҮҮЛӨР – кыргыздын музыкалык фольклорунда жана комуз музыкасында кеңири өнүккөн жанрдын бири. Арман күүлөрүндө негизинен кыргыз элинин өткөн замандагы кайгы-муңу, кедей, жетим-жесирлердин оор турмушу баяндалат. Koмузда арман күү жөнөкөй кайрыктардан тартып кеңири масштабдуу классикалык күүлөргө чейин өскөн (мисалы, «Көкөй кести», «Кыздын арманы», «Арман күү», «Жетим баланын арманы», «Музоокенин мундуу күү» жана башка). Айрым арман күүлөр автордун ысымы менен кошо айтылат: «Абактын арманы», «Арстанбектин арманы», «Серкебайдын арманы» жана башка. Ботойлор, шыңгырамалар, кербездер, камбаркандар жана башкалар арман деген аныктама менен коштолуп чертилүүсү мүмкүн (мисалы, «Арман кербез», «Армандуу ботой», «Арман шыңгырама»). Арман күүлөрдүн өзүнө тийиштүү толгоосу, чертүү чеги жана ыкмалары болот.