АГОНИЯ

(гр. agonia ‒ жанталашуу, күрөш) ‒ адам м-н жаныбарлардын өлөр (үзүлөр) алдындагы абалы. А. ‒ клиникалык учур, эгер жардам көрүлбөсө биол. өлүм м-н бүтөт. Мында дем алуу начарлайт, кыркырак пайда болуп, акыл-эстен танат, сезүү органдарынын иши төмөндөйт, жүрөктүн кагышы солгундайт, өӊү кубарат, териси, эрини көгөрөт. А. бир нече секундадан 1‒2 саатка чейин созулат. А-нын алдында тамырдын кагышы бир калыпта болбой, айрым учурда кан басымы жогорулайт. Андан кийин жүрөктүн кагуу ыргагы жоголуп, кан басымы нөлгө чейин түшөт, эрксиз заарасы, заӊы чыгып кетет. Дем алуу ж-а кан айлануу токтоп, клиникалык өлүм башталат. А. абалынан айрым учурда, мис., кан көп жоготкондо, эстен танганда, асфиксияда өз убагында мед. жардам көрсөтүлсө, адам өмүрүн сактап калуу мүмкүн.