АССАМ

– тарыхый облус. Индиянын түн.-чыгышында жайгашкан. Борбору – Диспур, эң ири шаары – Гувахати. Калкы 31 169 272 киши (2011). Аянты 78,438 км². Негизги дарыясы Брахмапутра, туурасы 80–100 км, уз. 1000 км. Аймак дүйнөдө ассам чайы м-н белгилүү. Нефть, газ ж-а көмүр кендери, кварцит, силлиманит, каолинит, чопо, талаа шпаты ж.б. кендерге бай. Аймакта улуттук парктар ж-а коруктар бар. Анда индиялык керик ж.б. сейрек кездешүүчү жаныбарлардын түрлөрү жашайт. Ассам аймагында Бангладеш м-н Бутандын бир бөлүгү болгон Камарупа мамлекети өкүм сүргөн. 13-к-да Кытай иммигранттарынан Ахом династиясы негизделген. А. 1824–26-ж-дагы биринчи Англо-Бирма согушунун натыйжасында Британия империясынын курамында. «Бенгалия ж-а Ассам» мамлекети түзүлүп, ага Бангладеш, Батыш Бенгал ж-а Индиянын түн.-чыгыш тарабы кирген. 1947-ж. Индия көз карандысыздыкка жеткенде, А. Индиянын түн.-чыгыш аймактарын бириктирген ири мамлекет болгон. Учурда мурдагы А. ж-а ага көз каранды мамлекеттердин аймагын А., Манипур, Трипура, Мизорам, Мегхалая, Нагаланд ж-а Аруначал-Прадеш штаттары ээлейт. Аймактын экономикасынын негизин айыл чарбасы түзөт. Джут, чай ж. б. өстүрүлөт. Мунай өндүрүлөт. Аймак суу ресурстарына ээ (Брахмапутра дарыясы ж-а анын куймалары). Алтын, кымбат баалуу таш кендерин казып алынат. А-да салттуу уруулук жашоо образын колдогон индо-европалык элдер сакталып калган.