АНТИТЕЗА барагынын баштапкы кодун көрүү

 (гр. antithesis – карама-каршылык) -
көркөм чыгармада кеңири колдонулуучу стилистикалык ыкмалардын бир түрү. Акындар
чыгармаларындагы каармандардын мүнөзүн толук ачуу ж-а окурмандарга эстет, күчтүү таасир
калтыруу үчүн карама-каршы түшүнүктөрдү бир
бүтүн сүйлөмгө же сөз тизмектерине топтойт.
Мис., «Келериңде дүнүйө, жыйырма беш жаштайсың, кетериңде дүнүйө, жыдыган кара чачтайсың» (Токтогул), «Унчукпасам, улутунуп
зерикпе. Өкүм айтсам, уялдым деп терикпе»
(А. Токомбаев), о. эле Б. Сарногоевдин «Сага
айткан сөз» деген ыры баштан-аяк А. формасында жазылган. Акын турмуштун карама-каршы, «караңгы жана жарык» жактарын ачык,
даана сүрөттөөгө жетише алган. А. жалаң гана
поэтикалык чыгармаларда эмес, прозалык ж-а
публ. чыгармаларда, изилдөөлөрдө ж-а макалаларда ж. б. кеңири кездешет. Мындай ыкманы колдонууда автор өз позициясын, идеясын,
проблемасын ачык, даана ж-а элестүү бериш үчүн
бир-бирине карама-каршы түшүнүктөрдү, туюнтмаларды пайдаланат. Мис., «Турмушта эмнелер жок! Кубаныч менен өкүнүч, күлкү менен ый,
шаттык менен кайгы, «жалкоо менен ишмер»,
«Жеңилүү менен жеңүү», «жек көрүү менен
жактыруу» дагы-дагылар толуп жатат, бул чындык» (А. Токомбаев, Автобиографиялык фрагмент). Социалдык-коомдук турмуштагы, адамдар турмушундагы ар түрдүү конфликтүү кырдаалдарды ачык, даана сүрөттөө максатында
А-лык сүрөттөө кеңири эпикалык масштабдагы
чыгармаларда да кеңири колдонулат.