КИНДИК ВОЛЬФРАМ КЕНИ
КИНДИК ВОЛЬФРА́М КЕНИ Ош облусунун Ноокат районунда, Алай кырка тоосунун түндүк капталында, Киндик суусунун баш жагында, деңиз деңгээлинен 4000–4200 м бийикте. 1940-жылы ачылган. 1976–78-жылдарда геологиялык картасы түзүлгөн ж-а изилденген. Кен аймагынын геологиялык түзүлүшүнө акиташ катмарчасынан турган терриген катмары ж-а аны жиреп чыккан гранит интрузиясы катышат. Граниттин акиташ м-н болгон чегинде скарн тулкулары бар. Алардын узундугу 320 м, калыңдыгы 20 мге чейин. Скарн м-н шеелит, молибденит минералдары байланышта. Вольфрамдын үч оксидинин орточо өлчөмү 0,26%. Кенташтын С2 категориясы боюнча запасы 1135,0 миң т, вольфрамдын үч оксиди – 2951 т.