КЕРЕТАРО
КЕРЕ́ТАРО , С а н т ь я г о - д е - К е р е т а р о – Мексиканын борб. бөлүгүндөгү шаар. Керетаро штатынын адм. борбору. Калкы 658,2 миң (2008; шаар агломерациясында 978,7 миң). К. аркылуу маанилүү федерация трассалары өтөт. Эл аралык аэропорту бар. Байыркы индейлер шаары. Ацтектер мамлекетинин курамына кирген. 1655-жылдан шаар статусуна ээ. 1726-ж. акведук курулган (1970-ж. чейин иштеген). Барокко стилиндеги кооз жасалгаланган ак сарайлар, чиркөөлөр, монастырлар (Ла-Крус, 1682; Сан- Франсиско, 16–17-к. ж. б.), классицизм стилиндеги Санта-Тереса чиркөөсү (1803–07), театр ж. б. сакталган. Шаардын эски бөлүгү Бүткүл дүйнөлүк мурастын тизмесине кирген. Мексиканын ири экон. борбору. Мигранттардын эсебинен өнүгүүдө. Бизнести өнүктүрүүгө ыңгайлуу шарты бар шаарлардын катарына кирет (Латын Америкасында 5-, өлкөдө 2-орунда). Машина ж-а станок куруу, металл иштетүү, тамак-аш ө. ж. үчүн
жабдуу, хим. (полиэтилен, пластика идиштери), текстиль, тиричилик, а. ч. техникалары өндүрүштөрү иштейт. 2008-ж. канадалык «Bombardier» компаниясынын ишканасы (самолёттор үчүн тетиктер) расмий түрдө ачылган. К-да мексикалык ж-а чет өлкөлүк компаниялардын штаб-квартиралары жайгашкан. Ун-ттер, ин-ттар, бир нече музей бар. К-га жакын жерде Коррехидоре (Эль-Пуэблито, 1-миң жылдыктын 2-жарымы) пирамидасы, Сан-Пабло монастыры (1550–66) сакталган.