ДИДИЭСЫ

ДИДИЭСЫ Наньчжу – кытай жылнаамала­рында эскерилген кыргыз элчисинин аты. 843- жылдын 8-айында (29-август–27-сентябрь) ас­кер башчы Дидиэсы кыргыз каганынын атынан Тан империясынын (б. з. 7–10-кылымдарда Кытайдагы ири мамлекеттин аталышы) императору (840–846) Уцзундун кабыл алуусунда болгон элчилердин бири (кара: Алп Сол Табу (Та-бу) Хэцзу). Элчи кыргыз каганы­нын расмий катын тапшырып, белек катары эки ак боз аргымак тартуу кылган. Жооп ка­тында Тан династиясынын (618–907) императору кыргыз каганынын элчисин расмий деңгээлде өтө жо­гору даражадагы урмат-сый менен үч ирет кабыл алгандыгын жана душмандарына каршы биргелешкен күрөштү дагы уланта берерин билдир­ген. Ошондой эле Борбордук Азия жана ага жамаатташ чөл­көмдөгү чек ара коопсуздугуна күч-кубаттуу кыр­гыз кагандыгы тынчтыктын тиреги боло тур­гандыгы айтылган.

Ад.: Супруненко Г. П. Некоторые источники по древней истории кыргызов //История и культура Китая (Сборник памяти академика В.П. Васильева). М., 1974; Бичурин (Иакинф) H. Я. Собрание сведений о народах, обитавших в Средней Азии в древние времена. Т. 1. М.-Л., 1950.

О. Каратаев.