КАМЫР
КАМЫР – нан, кесме, кондитер азыктарын ж. б. даярдоо үчүн ундан жуурулуп жасалган чийки азык. К. даярдоо ыкмасына жараша а ч ы г а н К., к а б а т т а л г а н К., б и с к в и т К-ы, ү б ө л ө н м ө К., к у р г а к К., к ө п ш ө к К. ж. б. болуп айырмаланат. Ачыган К-дан түрдүү нан азыктары (бөлкө, булочка, пирог, кекс ж. б.) жасалат. Адегенде жуурулчу К-дын унун элеп, андан кийин ага суу, туз, камыр туруш (к. Ачыткы), кээде сүт, айран, жумуртка, кант, май ж. б. кошуп жууруп, ийлеп, ачытат. Кесме, каттама, калама ж. б. тамак-аш жасалуучу К. ачытылбайт. К. наабайканада (нан, булочка ж. б.), макарон ж-а кондитер ө. ж-нда ар түрдүү азыктарды (кесме, пряник, печенье, торт ж. б.) жасоодо кеңири колдонулат. К-дын курамында белок, углевод, май, туз ж-а түрдүү абалдагы башка заттар көп болот. К-га ачыткы м-н туздан башка май, кант, жумуртка, жыттуу заттарды кошсо, алар нандын даамын, жытын ж-а аш болумдуулугун жакшыртат.