КАМЕРАЛЫК МУЗЫКА
КАМЕРАЛЫК МУЗЫКА – аткаруучулардын чакан тобу чакан жайда аткарууга арналган аспаптык же вокалдык чыгарма. Адеп пайда болгондо (орто кылымда) саналуу гана угуучулар үчүн аткарылса, XIX кылымдан чоң концерт залында ойноло баштаган. Камералык музыка XVI кылымдын аягына чейин вокалдык жанр, XVII кылымдан аспаптык музыка деп аталган. XVI–XVIII кылымдарда ал термин жарандык музыканы да туюндурган. Азыркы камералык-аспаптык ансамблдин түрлөрү (трио, квартет жана башкалар) веналык классикалык мектептин өкүлдөрүнүн (Й. Гайдн, В. А. Моцарт, Л. Бетховен) чыгармачылыгында пайда болгон. XVIII кылымдын аягында, айрыкча XIX кылымда вокалдык камералык музыкага көрүнүктүү орус композиторлору да кайрылган. Камералык музыка кыргыз профессионал музыкасында да кеңири өнүгүүдө, к. Кыргыз академиялык камералык хору.