КАРА АКСАК
КАРА АКСАК (Paronychia contagiosa) – малдын туягын сезгентүүчү жугуштуу ылаң. Адегенде, салаасы жабыркап, кийинчерээк терең жарага айланып, туякты чиритет. К. а. м-н кой, эчки ж-а бодо мал ылаңдайт. Ылаң козгогуч бактерия туяктын ар кандай жаракатында, нымдуулукта ж-а организм начарлаганда жугат. Ылаң соо малга ылаңдаган койдон, микроб м-н булганган кыктан, суудан, топурактан, тоюттан ж. б-дан жугат. Кырг-ндын шартында К. а. айрыкча жаз ж-а күз мезгилдеринде кеңири таралат. Ылаңдын букма мезгили 3–6 күн. Ылаң белгилери башталганда эле бардык ылаңдуу мал өзүнчө бөлүнүп, аларды сиңимдүү тоют ж-а кургак жайлар м-н камсыз кылуу зарыл. Өсүп кеткен туякты кесип, жараланган жерлерин тазалайт. К. а. жеңил формада өткөндө аэрозолдуу дарылар – кубатол ж-а хроницин жакшы натыйжа берет.
Ад.: Архангельский И. И. и др. Копытная гниль овец. М., 1986; Раимбеков Д. Эпизоотология жана айыл чарба жаныбарларынын жугуштуу ылаңдары. Б., 2007.