КАБАК (Жети-Өгүз районундагы кыштак)
КАБАК – Ысык-Көл облусунун Жети-Өгүз районундагы кыштак. Жети-Өгүз айыл округуна караштуу. Ысык-Көл өрөөнүндө, Жети-Өгүз суусунун төмөнкү агымынын чыгыш жээгинде, деңиз деңгээлинен 1655 м бийикте жайгашкан. Райондун борбору Кызыл-Суу кыштагынан 25 км түндүк-чыгыш тарапта. Балыкчы темир жол бекетинен 210 км. Кыштак 1929-жылы негизделген. Калкы 1344 (2022); негизинен мал м-н алектенип, тоют даярдашат. Орто мектеп, китепкана, медпункт бар. Соода жайлары иштейт. Улуу Ата Мекендик согушта курман болгондорго эстелик тургузулган. Кыштакта Социалисттик Эмгектин Баатыры С. Эшенова туулган. Кыштактын аты кыргыздын кабак уруусу м-н байланыштуу.