ЗАЛАЛ
ЗАЛАЛ – КРдин жарандык укугунда жарандын өздүгүнө же мүлкүнө, ошондой эле юридикалык жакка келтирилген зыян. Залал келтирген жак анын ордун толук толтурушу керек. Мыйзам боюнча залал келтирбеген жакка дагы зыяндын ордун толтуруу милдети жүктөлүшү мүмкүн. Мыйзам же келишим боюнча залал келтирген жакка залалдын өлчөмүнөн башка ордун толтуруучу төлөм милдети жүктөлүшү мүмкүн. Залал келтирген жак эгер келтирилген залалга алардын күнөөсү жок экендигин далилдесе, залалдын ордун толтуруу милдетинен бошотулат. Бирок мыйзамда залалды келтирүүгө күнөөсү жок болгон учурда да, анын ордун толтуруу учурлары каралган. Укук ченемдүү аракеттер аркылуу келтирилген залал мыйзам тарабынан каралган учурларда гана орду толтурулат.