КАМЧАТКА (дарыя)

КАМЧА́ТКА (башатында – Көлдүү Камчатка) – Россиядагы дарыя, Камчатка обл-нда. Уз. 758 км, алабынын аянты 55,9 миң км². Ортолук кырка тоосунан башталат да, Борб. Камчатка ойдуңу аркылуу агып, Тынч океандын Камчатка булу­ңуна куят. Жер астындагы (35%), кар (34%), мөңгү (28%) ж-а жамгыр (3%) сууларынан ку­ралат. Жылдык орт. чыгымы төмөнкү агымында 921 м³/сек. Ноябрда тоңуп, апрель–майда ачы­лат; ысык булак чыккан жерлери тоңбойт. Ча­тынан 486 км аралыкка чейин кеме жүрөт. Сал агызылат. Лосось балыгы урук чачуучу жер. Ба­лык кармалат. Чатында Усть-Камчатск порту жайгашкан.