КЛИВЛЕНД

КЛИ́ВЛЕНД – АКШнын түндүк-чыгышындагы шаар. Огайо штатында. Эри көлүнүн түштүк жээ­гинде, Кайахога дарыясынын чатында жайгашкан. Калкы 367,9 миң (2021; шаар айланасы м-н 3 млн). Автомагистраль ж-а темир жол түйүнү. Хоп­кинс эл аралык ж-а Берк аэропорттору бар. Эри көлүндөгү порт. Метрополитен иштейт. АКШнын финансы-соода, илим, билим ж-а маданий ири борбору. Кара металлургия, металл иш­тетүүчү, электр-техника, химия, полиграфия өнөр жай ишкана­лары иштейт. Университеттер, илим-изилдөө борбору, музей (анын ичинде рок-н-ролл), театрлар (анын ичинде АКШдагы эң ири Плейхаус-сквер комплекси) бар. 1796-жылы ге­нерал М. Кливленддин экспедициясы тарабы­нан негизделген. 1836-жылдан шаар статусуна ээ. 1870-жылы Ж. Д. Рокфеллер Кливлендде «Standard Oil» компаниясын негиздеген, ал кийинчерээк эл аралык ири корпорацияга айланган. 1920-жыл­дардын башында эле АКШдагы эң ири өнөр жай борбору ж-а калкынын саны боюнча 5-шаар бол­гон. Паблик-сквер аянтында ар деко стилинде­ги «Терминал Тауэр» (1926–30; бийиктиги 216 м), постмодернизм стилиндеги «Ки Тауэр» (1991; 290 м) ж-а «200 Паблик-сквер» (1987; 216 м) ж. б. көптөгөн асман тиреген үйлөр жайгашкан. Пиа­нисттердин эл аралык конкурсу (1975; эки жыл­да бир), индия салттуу музыкасынын (АКШда­гы эң ири) ж-а эл аралык кино фестивалдары өткөрүлүп турат. Ботаникалык бак ж-а зоопарк уюш­турулган.