АССИМИЛЯЦИЯ (геологияда)

 [assimilatio ‒ окшоштук, кейиптенүү] г е о л о г и я д а ‒ магма м-н анын айлана-чөйрөсүндөгү тоотектердин өзара аракеттенишүү (эрүү, эритүү, сиӊирүү ж. б.) процесси. Магма жогору көтөрүлгөндө, жанаша жаткан тоотектерди ж-а магмага түшкөн алардын бөлүкчөлөрүн бүт же жарым-жартылай эритип, өзүнүн курамын, д. у. с. касиеттерин өзгөртөт. Ошондой эле жанаша жаткан тоотектер өзгөрүүлөргө учурап, алардан жаӊы тек келип чыгат. Кээде тоотектин кесек бөлүкчөлөрү магма м-н аралашып, ксенолитти (чоочун ташты) пайда кылат.