КЕС-СЕҢИР

КЕС-СЕҢИР – Күнгөй Ала-Тоонун түш. этегин­де Ысык-Көлгө эңкейиш кыр, көлгө кирип тур­ган тумшук. Ысык-Көлдүн түн. жээгинин дал ортосунда, Чоң Сөгөттү ж-а Кичи Сөгөттү суу­ларынын аралыгында жайгашкан. Уз. 4 км, эң жазы жери 2,5 км, деңиз деңг. 2000–1600 м би­йикте. Жеринин бети аска-таштуу, капталда­ры көбүнчө тик. Тикендүү майда бадалдар, чо­гойно, шыраалжын ж. б. өсүмдүктөр өсөт. Не­гизи силур, девондун граниттеринен, эки жагы олигоцен, миоцендин конгломерат, алевролит ж. б. тоо тектеринен турат. Көл жээгиндеги жолду тороп, жүргүнчүлөргө тоскоол болгондук­тан, сеңирдин жапыз жерин оюп, кесип жол салынган. Бул кыр илгери эле К.-С., ал эми жол­дун өткөн жери Кескен-Бел аталган делет. Но­мендин экөө тең 19-к-дын 1-жарымында эле бол­гон; 1856–60-ж. тартылган карталарда топоним Кессеңгир, Кесексеңгир, Кисенгыр, Ч. Валиха­новдун эмгектеринде (1856–61) Керсенгир, Ки­сенгыр түрүндө кезигет. К.-С. «Пришиб» деп да жазылып жүрөт. Почта тартуу, жол катнашы үчүн 1870–71-ж. К.-С-дин тумшугун жарып жол салынган.