КАРА-КУЖУР МАРМАР КЕНИ

КАРА-КУЖУР МРА́МОР КЕНИ Нарын облусунун Кочкор районунда, Сары-Булак кыштагынан 56 км чы­гышта, Тескей Ала-Тоонун түштүк капталындагы Кара-Кужур суусунун башталышында. 1973–1975-жылдары геологиялык изилдөө жүргүзүлгөн. Кен аймагын­да протерозойдун ортосунда пайда болгон мар­марлашкан жана доломиттешкен акиташ теги­нин, графит сымал сланецтердин катмарлары жатат. Алардын жалпы калыңдыгы 2400–3000 м. Мында кооз таш катары мармардын 3 түрү кезигет: 1) бир өңчөй ак, майда бүртүкчөлүү доломиттешкен мармвр. Блоктуулугу 0,3–0,5 м³; 2) боз, агыш, кооз темгилдери бар орточо бүртүк­чөлүү мармар. Блоктуулугу 0,2–0,4 м³; 3) ак мармар, арасында боз жана каралжын боз, жол­-жол, ичке темгилдүү, майда жана орточо бүртүкчө­лүү түрлөрү бар. Блоктуулугу 0,1–0,3 м. Мармар­дын 3 түрү тең жакшы сайкалданат, кооз көрү­нөт. Кору 40 млн м³. Имараттардын ички жана сырткы дубалдарын кооздоп каптоого жарайт.