КЫРГЫЗ УЯҢ ЖҮНДҮҮ КОЮ
КЫРГЫЗ УЯҢ ЖҮНДҮҮ КОЮ – жүн-эт багытындагы кой породасы. Жергиликтуу кылчык жүндүү куйруктуу койду түрдүү породадагы уяң жүндүү кочкорлор м-н аргындаштыруу аркылуу Талас облусундагы «Жоон-Төбө» асыл тукум кой ө с т ү р ү ү заводунда
чыгарылган (1939–53). Аргындаштыруу үчүн (1928–40) Кыргызстанга кавказ мериносу, римбулье, нюртемберг ж-а прекос койлорунун кочкорлору алынып келинген. 1939-ж. экинчи ж-а үчүнчү муундагы аргын койлорду өз ара аргындаштыруу жолу м-н уяң жүндүү койдун жаңы п ородасын чыгаруу ошол учурда гы «Жоон-Төбө» совхозунда, Кыргызстан мал чарба ж-а ветеринария ИИИнин станцияларында, Калинин (азыркы Жайыл) райнунун чарбаларында (Панфилов, Крупская атындагы колхоздордо) уюштурулган. Аргын койдун жүндүүлүгүнун сапатын жакшыртуу максатында грозный кою м-н ставрополь коюунун кочкорлору м-н куудурулган. Бул кой эттүү, тоо шартына жакшы байымдуу.
Кочкорунун орточо тирүүлөй салмагы 90–100 кг (айрымдары 120 кг), жүнүнүн узундугу 7,5–9,3 см, соолугунуку 7,5–8,5 см. Кочкорунун жүнү 60-, соолугунун жүнү 60–64-сапатта. Ар кочкордон 8– 10 кг (айрымдарынан 16 кг), соолугунан 3,8– 4,3 кг жүн кыркылат, таза жүндүн чыгышы 50– 53%. Ар жүз тубар койдон 120–150 козу алынат. Кочкорунун бийиктиги 74–81 см (соолугунуку 67–73 см), тулку боюнун узундугу 74–88 см (67– 77 см), көөдөнүнүн кеңдиги 25–55 см (23–29 см).Кыргызстанда асыл тукум фермердик чарбаларда асыралат.
Ад.: Лущихин М. Н. Кыргыз тукумундагы уяң жүндүү кой. Ф., 1959; Тоолуу шарттарда уяң жүндүү кой чарбасын өстүрүүнүн технологиясы. Ф., 1981.