КЫРГЫЗСТАН АДАМ РЕПРОДУКЦИЯСЫ ИЛИМИЙ БОРБОРУ (КАРИБ)
КЫРГЫЗСТАН АДАМ РЕПРОДУКЦИЯСЫ ИЛИМИЙ БОРБОРУ (КАРИБ) – балдар м-н аялдарга медициналык тейлөөнү жакшыртуу, калктын тукум улантууга байланышкан саламаттыгын изилдөө ж-а калыбына келтирүү боюнча илимий иштерди жүргүзүүчү мекеме. 1997-ж. уюшулган. КРдин Саламаттык сактоо министрлигине караштуу. КАРИБ аял м-н эркектин тукум улантуу системасынын түрдүү ооруларын өз убагында дарылоо ж-а алдын алуу боюнча натыйжалуу ыкмаларды иштеп чыгуу максатын көздөйт. Борбордо амбулаториялык ж-а адистешкен стационардык кызмат иштейт. Амбулаториялык кызматтын пренаталдык (төрөт алдында) диагноздоо ж-а медициналык-генетикалык кеңеш берүү, микробиологиялык, биохимиялык, жалпы клиникалык изилдөө, цитогенетикалык изилдөө ж. б. лабораториялары бар. Ошондой эле үй-бүлөнү пландоо, физиотерапия, андрология, тукумсуздук, акушер-гинекология, гинекологэндокринолог, балдар гинекологиясы, жатын моюнчасынын патологиясы боюнча адистешкен кабинеттери иштейт. Стационар бөлүмүндө гинекологиялык эндокринология, реанимация ж-а анестезиология, гинекологиялык хирургия ж-а эндоскопия, аялдардын репродукциялык функциясын дарылоо бөлүмчөлөрү бар. Бул борбор балдар гинекологиясы, медициналык генетика ж-а тукум улантуучулугун, ошондой эле аялдын ж-а эркектин тукум улантуу системасынын патологиясын, клиникалык өтүшүн ж-а өзгөчөлүгүн изилдейт. Борбордо медицина илимдеринин 3 доктору, 7 кандидаты эмгектенет (2010).