КЫРГЫЗПОЛИГРАФКОМБИНАТЫ
КЫРГЫЗПОЛИГРАФКОМБИНАТЫ Т. С у в а нб е р д и е в а т н. 1966-жылдын май айында ишке киргизилген. О. Азиядагы китеп басып чыгаруучу эң ири полиграфия ишканасы болгон. Комбинат ар түрдүү ад-ттарды, окуу китептерин, окуу куралдарын, түстүү сүрөттүү ар кандай продукцияларды, элге керектүү майда товарларды ж. б. продукцияларды чыгарууга багытталган. Ишкана негизги терүү, басма, мукабалоо цехтеринен ж-а жардамчы технол., тех. бөлүмдөрдөн турган. Ошол убактагы заманбап техника м-н жабдылса да китеп өндүрүү процесстеринин көпчүлүгү механикалаштырылган эмес. 1970–80-жылдарда автоматташтырылган техника, жаңы технология ж-а материалдар өздөштүрүлүп, жаңылануу ургаалдуу жүргөн. «К.» алгачкы «Кыргыз совет энциклопедиясын», ар кандай форматтагы китептерди басып чыгарган. Китеп басуу жаатында башка респ-калардын басмалары м-н кызматташып турган. Ишканада Москва, Ленинград, Киев, Львов ш-нын окуу жайларында жогорку ж-а атайын орто билим алган жогорку квалификациялуу жумушчу адистер иштеп, улуттук кадрлар даярдалган, союздук борб. ишканаларда кесиптик билимин жогорулатып турган. Комбинат чыгарган басма продукциянын 90%и окуу китептерине туура келген. Комбинатта даярдалган китептер жогорку сапатта болуп, О. Азия, Казакстан Респнын, эл аралык «Искусство книги» конкурстарында көптөгөн жогорку байгелерге ээ болгон. Ийгиликтүү иши үчүн союздук маанидеги Өтмө Кызыл Туусун 21 жолу жеңип алган. Комбинат ишке киргизилген күндөн 25 жыл бою жетектеп, басма ишинин өнүгүшүнө чоң салым кошкон Т. Суванбердиевдин ысмы ишкана жайгашкан көчөгө ж-а ишканага 1995-ж. ыйгарылган. Рынок экономикасына ыңгайлаша албаган ишкана 1990-жылдардын 2-жарымында К. начарлай баштап, 1998-ж. ААКка айланган ж-а 2008-ж. ишин токтоткон. Ж.
Шайыкбекова.