КЫЙШЫК МОЮН
КЫЙШЫК МОЮН , к ы л ж ы р – моюндун бир тарабындагы булчуңдардын тартылышынын, моюн омурткаларынын кыйшайышынын ж-а оорусунун кесепетинен моюндун жантык абалы. Ал көбүнчө тубаса, баланын жатында туура эмес өсүшүнөн, төрөт кыйын болгон учурда баланын моюн ткандарынын кокусташынан, ошондой эле күйүктөн, жарааттан ж. б. тырыктардын тартылып калышынан болот. Моюн булчуңу жабыркаган жакка баш кыйшайып, ээк көтөрүңкү болуп, карама-каршы тарапка бурулат. Тубаса кыйшык моюн бала төрөлгөндө эле билинет. Дарылоо эрте башталбаса, акырындап моюн омурткалары, бет кыйшаят. Ошондуктан анын белгилери билинер замат врачка кайрылуу керек. Анын көрсөтмөсү м-н укалоо, дарылоо көнүгүүлөрүн жасаса болот (биринчи ирет врачтын көзөмөлүндө жасалат). Дарылоо мезгилинде баланы уктатканда башын соо жагына оодара жаткыруу зарыл. Хирургиялык жол м-н да дарылайт.