КЫДЫРНАЗАРОВ
КЫДЫРНАЗАРОВ Асанбек (1930, азыркы Нарын облусу, Нарын району, Ак-Булуң айылы – 1994, Бишкек) – комузчу, режиссёр, драма артисти, Кыргыз ССРинин эмгек сиңирген артисти (1977). Нарын айыл чарба техникумун (1947), Москвадагы А . Луначарский атындагы театр институтун (1957) бүткөн.
1950–1952-жылдары Нарын райондук маданият үйүндө жетекчи, 1958–1963-жылдары Нарын музыкалык драма театрында режиссёр болуп иштеп, «Куйручук» (М. Рыскулов, А. Көбөгөнов), «Комуздун тагдыры» (Р. Шүкүрбеков), «Эч кимге айтпа» (Т. Абдумомунов), «Гүлнара» (Н. Жүндүбаева), «Саринжи-Бөкөй» (К. Эшмамбетов) жана башка пьесаларды койгон. 1963–1991-жылдары Кыргыз мамлекеттик драма театрында ар кандай тагдырдагы, мүнөздөгү, түрдүү курактагы образдарды жараткан: Токтогул, Байтерек, Садыркул (Т. Абдумомунов, «Сүйүү жана Үмүт»,«Каркыралар кайтканда», «Атабектин кызы»), Азат Султанович (М. Байжиев, «Ар бир үйдө майрам»), Вожак (В. Вишневский, «Оптимисттик трагедия»), Бакай (Ж. Садыков, «Манастын уулу Семетей») жана башкалар.
А. Кыдырназаров залкар комузчу да болгон. Ал Карамолдонун «Сынган бугу», «Насыйкат», Абактын «Кара кашка аргымак» жана башка күүлөрүн ийине жеткире черткен. Өзү «Кыргыз көчү», «Бешик», «Калмак ашуу», «Тилек», «Саамал», «Запкы», «Көк бөрү», «Бир кайрык», «Өксүү» жана башка кара күүлөрдү чыгарган, анын ичинде «Кыргыз көчү» оригиналдуулугу менен комуз күүлөрүнүн классикасына айланды. Кыргыз Республикасынын коомдук телерадио берүү корпорациясынын алтын казынасына 20дай күүсү жазылып алынган, айрымдары эл аспаптар, симфониялык оркестрлерге салынган.
Б. Алагушов.