КЫДЫРАЛИЕВ Кадыржан

КЫДЫРАЛИЕВ Кадыржан (1. 4. 1936, Чүй облусу, азыркы Жайыл району, Чолок – 27. 8. 2015, Бишкек) – кинооператор, Кыргыз ССРинин эл артисти (1982), Кыргыз ССРинин искусствого эмгек сиңирген ишмери (1969), Кыргыз ССР Токтогул атындагы мамлекеттик сыйлыктын (1972), Кыргызстан Ленин комсомолу сыйлыгынын (1968) лауреаты. 1961-жылы Бүткүл союздук мамлекеттик кинематография институтун бүткөндөн «Кыргыз фильм» студиясында иштеген.

Кыдыралиев өз ишмердигин даректүү тасмаларда жана илимимй-коомдук кино тармагында иштөөдөн баштаган. Ал «Тоо суусу» (1960), «Ырдын жаралышы» (1961), «Улуу эпос» (1962), «Аскалар» (1963), «Жылкылар» (1965), «Кыргыз деңизи» (1965), «Оодарыш» (1970) жана башка тасмалардын оператору. К. Кыдыралиев 1964-жылдан көркөм тасмалардын оператор-коюучусу катары «Тайгак кечүү» (1964, режиссёру М. Убукеев), «Бакай­дын жайыты» (1967, режиссёру Т. Океев),

К. Кыдыралиев «Тайгак кечүү» тасмасын тартуу учурунда. 1964.

«Жамийла» (1968, режиссёру И. Поплавская, «Мосфильм»), «Уркуя» (1972, режиссёру Т. Океев), «Мен – Тянь-Шань» (1973, режиссёру И. Поплавская, «Мосфильм»), «Көк серек» (1974, режиссёру Т. Океев, «Казакфильм») жана башка тасмаларды тарткан. Кыдыралиев «Бабалар өрөөнү» (1992), «Талаада атылган ок» (1993) аттуу тасмалардын режиссёру. «Ардак Белгиси» ор­дени, Даңк медалы (2008) менен сыйланган.