КУРЧОО

КУРЧОО (согушта) – душман топторун башка аскерлеринен ажыратып, талкалоо же туткундоо. К. душмандын коргонуусун фронттун бир нече участкасынан бузуп кирип, кошулуу багытында чабуулду күчөтүү менен ишке ашырылат. Анын натыйжасында душмандын К-догу топторун башка аскерлеринен ажыратуучу сырткы фронт жана туташ ички фронт түзүлөт. К. чегинген душмандын артынан түшүүдө, контр чабуул убагында ж. б. учурларда жүзөгө ашырылышы мүмкүн. Улуу Ата Мекендик согушта (1941–45) сов. аскерлер Сталинград салгылашында (1942–43), Яссы – Кишинёв (1944), Берлин (1945) ж. б. операцияларында душмандын эң ири топторун К-го алып талкалаган.