КУРМАНОВ Таалай
КУРМАНОВ Таалай (22. 5. 1949-жылы туулган, Чүй облусу, Чүй району, Талды-Булак айылы) - сүрѳтчү, Кыргыз Республикасынын эл сүрѳтчүсү (2003), Кыргыз Республикасынын маданиятына эмгек сиңирген ишмер (1991), Кыргыз маданиятынын мыкты кызматкери (2005), 1983-жылдан СССР жана Кыргыз CCP Сүрѳтчүлѳр союзунун мүчѳсү. Фрунзедеги кѳркѳм сүрѳт окуу жайын (1968), Ленинграддагы В. И. Мухина атындагы жогорку кѳркѳм ѳнөр жай окуу жайын бүтүргѳн (1976).
1971-жылдан республикалык, Бүткүл союздук жана эл аралык кѳргѳзмѳлѳрдүн катышуучусу. 1976-1993-жылдары Кыргыз Республикасынын сүрѳтчүлѳр союзунун Кѳркѳм сүрѳт фондунда эмгектенген. 1988-1989-жылдары Кыргыз мамлекеттик басма комитетинде башкы сүрѳтчү, 1998-жылдан Кыргыз Республикасынын Сүрѳтчүлѳр союзунун башкармасынын тѳрагасы.
Курмановдун чыгармачылыгы живопись, станоктук графика, плакат, дизайн тармактарында бирдей ѳнүккѳндүгү менен ѳзгѳчѳлѳнѳт. Курманов китеп графикасында да жемиштүү эмгектенип, Р. Киплинг, Д. Дефо, Н. Гоголь, К. Жантѳшев, А. Тыныбеков, Ч. Айтматовдун чыгармаларын жана «Эр Тѳштүк», «Жаңыл Мырза», «Кожожаш» кенже эпосторун, С. Каралаевдин варианты
.боюнча «Манас» үчилтигинин 5 томдугун кѳркѳмдѳгѳн. Курманов Бишкектин борбордук аянтындагы жасалга эскиздеринин, календарлардын, «Манас» аэропортунун росписинин автору. Анын эмгектери жергиликтүү жана чет ѳлкѳлүк (Казакстан, Россия, Германия, Франция, Италия, Америка Кошмо Штаттары, Англия жана башкалар) музейлерде сакталуу. Курманов Бүткүл дүйнѳлүк интеллектуалдык менчиктин алтын медалы, 3 жолу «Алтын мукаба» гран-приси менен сыйланган.