КУЛИКОВ САЛГЫЛАШЫ
КУЛИКО́В САЛГЫЛАШЫ (1380) – Владимир жана Москванын улуу князы Д. И. Донской жетектеген орус аскерлери менен Мамай башында турган моңгол-татарлардын1380-ж.Куликов талаасында салгылашуусу. Мамай Рустун Алтын Ордого көз карандылыгын күчөтүү үчүн 100–150 миңдей кол курап, Литванын, Рязандын улуу княздары менен союздашып, орустарга каршы жортуулга чыккан.
Муну уккан Д. И. Донской 8- сентябрда резерв полкторун Дондун сол жээгиндеги Куликов талаасына жайгаштырган. Салгылаш Пересвет жана Челубей баатырлардын жекеде сайышы менен башталып, андан экөө тең каза болгон. Адегенде ийгиликке татарлар жеткен, бирок Боброк-Волынец жана Владимир Андреевич жетектеген буктурмадагы орус аскерлеринин чабуулга өтүшү менен Мамайдын аскерлери жеңилген. К. с. Алтын Ордонун кулашын тездетип, орус мамлекетин түзүүдө Москва княздыгынын ролун күчөткөн. 1850-ж. Кызыл Дөбөгө Дмитрий Донскойго мамы түрүндөгү эстелик тургузулган. 1996-ж. «Куликов талаасы» аскердик-тарыхый жана жаратылыш музей-коругу уюшулган.
Ад.: Куликово поле: Большая иллюстрированная энциклопедия. Тула, 2007.