КООЗ ӨСҮМДҮКТӨР
КООЗ ӨСҮМДҮКТӨР – кооздук үчүн өстүрүлүүчү өсүмдүктөр тобу. Калк жашаган жерлерди жашылдандыруу, турак жай, гүлзар, көчөлөрдү көрктөндүрүү үчүн өстүрүлөт; Кооз өсүмдуктөрдүн коргоо, санитардык - гигиеналык ж. б. мааниси бар. Өсүмдүктүн биологиялык, экологиялык. өзгөчөлүктөрүнө ж-а өстүрүүнүн агротехникалык ыкмасына жараша кооз өсүмдүктөр төмөнкүчө бөлүнөт: кооз дарак ж-а бадалдар – жазы, ийне ж-а күбүлмө жалбырактуулар (эмен, кайың, акация, карагай, арча, мажрүм тал, мырза терек); бир жылдык, эки жылдык ж-а көп жылдык кооз өсүмдүктөр. Алар сабагынын өсүү формасына жараша сойломо, төшөлмө, тик өсүүчү ж-а ампелдик, өсүү шартына, пайдаланылышына жараша оранжерея, бөлмө кооз өсүмдүктөрү болуп айырмаланат. Алардан атыр гүл, георгина, чекилдек гүл, жоогазын ж. б. гүлдөрдүн көптөгөн жаңы сорттору ж-а түрлөрү чыгарылган.