КОЛУМБИЯ 1

КОЛУ́МБИЯ – Канада м-н АКШдагы дарыя. Уз. 2000 км, алабынын аянты 669 миң км². Аска­луу тоолордогу Колумбия көлүнөн башталып, Тынч океанга куят. Бул жерде уз. 75 км, аянты 412 км² болгон эстуарий пайда болгон. Ири куй­масы – Снейк (сол). Колумбия платосунан кууш өрөөн аркылуу агып, Каскад тоолорун кесип өтөт. Суусу жаз, жай мезгилдеринде тоодогу кар, мөңгүлөрдүн эришинен ташкындап, кышында тартылат. Орт. чыгымы төмөнкү агымында (Те- Далс ш. тушта) 5200 м³/сек, жылдык агымы­нын көлөмү 164 км³. К. гидроэнергетикалык ресурстарга бай; анда суу сактагычтар ж-а ири ГЭСтер курулган; АКШда гидроэнергетиканын 50%и К. д-ндагы ГЭСтерден өндүрүлөт. Ири ГЭС-тери: Чиф-Жозеф, Гранд-Кули, Те-Далс, Мак-Нэри ж. б. 749 км аралыкка чейин кеме каттайт; де­ңиз кемелери Портленд, биржалар Ричленд ш-на чейин жетет. Боюнан Уэнатчи, Ричленд, Ванку­вер, Астория ш. (АКШ) орун алган. К. ж-а анын жээктери аңчылыкта, балык уулоодо, суу спорту м-н машыгууда кеңири пайдаланылат.