КОЛОМБО

КОЛО́МБО , К о л а м б а – Шри-Ланка арал мамлекетиндеги шаар, Батыш провинциянын административдик борбору. 1983-жылы өлкөнүн борбору Шри-Джаяварденепура-Котте шаарына расмий көчү­рүлгөн.
Шри-Ланка аралынын түштүк-батыш жээгинде, Ке­лани дарыясынын чатында жайгашкан. Инди океа­нындагы маанилүү деңиз жолдорунун кесили­шиндеги порт (дүйнөдөгү эң чоң жасалма гавань, аянты 2,25 млн м²). Өкмөт жана президент жайы. Калкы 678 миң (2008, шаар айланасы менен Чоң Коломбо шаар агломерациясын түзөт; калкы 2,5 млн). Шаарды көптөгөн каналдар түйүнү кесип өтүп, Коломбону Бейра көлү (шаардын борбо­рунда жайгашкан) менен туташтырат. Маанилүү жолдор тоому. Эл аралык аэропорту бар. Коломбонун түндүк жана түндүк-чыгыш административдик чек арасы Келани дарыясы аркылуу өтөт. VIII кылымдан араб көпөстөрүнүн Ка­ланпу деген аталыштагы кыштагы, XIV кылымдан Ко­лонтота деген ат менен маанилүү соода борбору катары белгилүү.Ушул эле жерде1517-жылы пор­тугалдар Коломбо фортун негиздешип, 1593-жылы Х. Колумбдун урматына аташкан. Коломбо 1802-жылдан Цейлон мамлекетинин, 1948-жылдан Цей­лон доминионунун, 1972-жылдан Шри-Ланка Республикасынын борбору.

Коломбо шаарынын көрүнүшү.

Шаарда өлкөнүн финансы банкы, камсыздан­дыруу ишканаларынын штаб-квартиралары жана Чоң Коломбодо Шри-Ланкадагы 6 эркин экономикалык зо­нанын бешөө жайгашкан. Тамак-аш (корица жана башка татымалдар), жеңил (булгаары буюм, кез­деме жана башкалар), химия (пластмасса, жер семирткич жана башкалар), кеме куруу жанаа ремонттоо, бут-кийим, металлургия, машина куруу (станок жана анын жабдуулары), айнек өнөр жай ишканалары, шина заводу иштейт. Кол өнөрчүлүк өнүккөн. Улуттук илимдер академиясы, университеттер (анын ичинде Видьяланкара будда), мамлекеттик илимий-изилдөө департаменти жана институттары (анын ичинде Улут­тук кеңеш, өнөр жай жана башкалар), медициналык институт, коллеждер (музыка, бий жана башкалар), Улуттук музей (анын ас­тында китепкана ачылган; анда тарыхый баа­луу китеп, журналдар жана кол жазмалар сак­талган), улуттук архив, обсерватория (1907), ки­тепканалар, сүрөт галереясы, театрлар жана башкалар бар. Фес­тивалдар (цирк артисттеринин Кэнди Эсала Пе­рахера, августта; буддага арналган Дуруту Пе­рахера, январда), чай аукциону (дүйнөдөгү эң ири) өткөрүлүп турат. Коломбодон түштүктө зоопарк уюштурулган. Аралдын тропиктик кооз табия­тына байланыштуу туризм өнүккөн.