КОЖОМБЕРДИЕВ 1
КОЖОМБЕРДИЕВ Турар (22. 6. 1941, Чүй обл., Жайыл р-ну, Сары-Булак айылы – 30. 1. 1989, Бишкек)
– акын, котормочу, Кырг-н Ленин комсомолу сыйл. лауреаты (1968). 1966-ж. КМУнун филология ф-тин бүтүргөн. 1965–66-ж. «Кыргызстан пионери» гезитинде адабий кызматкер, 1969-ж. «Кыргызстан» басмасында редактор, 1970-жылдардын 2-жарымында Маданият министрлигинде, 1976–83-ж. Респ. методикалык борбордо бөлүм башчы болуп иштеген. Туңгуч ырлар жыйнагы 1961-ж. «Көлчүктөгү ай» деген ат м-н жарык көргөн. К. – Бүткүл союздук фестивалдардын катышуучусу. «Кызыл алма» (1965), «Тоо үстүндөгү күн» (1966), «Таңкы симфония» (1968), «От өчпөгөн коломто» (1972), «Эне жана от» (1972), «Кызгылтым кеч» (1973), «Нурлуу терезе» (1975), «Токтогул ГЭСи» (1976), «Ай тийген тоо» (1981), «Ыр булак» (1984) ж. б. ыр жыйнактары бар. К. метафоралуу ой жүгүрткөн, айлана-чөйрөнү өзгөчө баамдаган лирик акын, поэзия м-н сүрөт жарата билген сезимтал сүрөткер катары кыргыз поэзиясын жаңы көз караш, көркөм табылгалар, жаңы темалар м-н байыткан. Кыргыз ад-тында обонго ылайыкталган ыр жанрын өзгөчө бийиктикке көтөргөн. К. Молдобасанов м-н бирдикте «Саманчынын жолу» аттуу балет-ораторияcынын, «Гүлдө Кыргызстан», «Шаңдан мекен» кантатанын, М. Абдраев м-н бирдикте «Лирикалык хоровод», Т. Эрматов м-н бирдикте «Элүү жылда элим жаңырды» аттуу кантаталардын тексттерин жазган. 70тен ашуун ырларына обон чыгарылган. К-дин айрым ырлары орус, украин, казак, азербайжан, өзбек, француз, англис ж. б. тилдерге которулган. Кара-Балта ш-ндагы борбордук көчөгө ж-а өзү туулуп өскөн айылындагы көчөгө, Сары-Булак орто мектебине ысмы ыйгарылган.
Ад.: Кожомбердиева У. Турар Кожомбердиев. Эскерүүлөр. Б., 2010.