КОЖОМБЕРДИЕВ
КОЖОМБЕРДИЕВ Ысман [1928, СССР, РСФСР, Кыргыз АССРи, Ош кантону, Жалал-Абад (азыркы Сузак) району, Үч-Малай кыштагы – 1988, Кыргыз ССРи, Фрунзе шаары] – кыргыздын туңгуч адис-археологу, тарых илимдеринин кандидаты (1987). 1950-жылы Кыргыз педагогикалык институтун бүтүргөн. 1954–1988-ж. Кыргыз ССР ИАнын Тарых институтунун илимий кызматкери, археология секторунун башчысы болуп иштеген. Кетмен-Төбө, Талас, Чаткал, Чүй өрөөндөрүнө жасалган археологиялык экспедицияларды жетектеп, коло доору жана байыркы көчмөндөргө таандык археологиялык эстеликтерди изилдеген. Айрыкча чыгыштан чыккан Улуу көч доору боюнча илимий изилдөөлөрү жаңы көз караштарды калыптандырган. Байыркы көчмөндөрдүн мыкты зергерлиги, аскер иши, чарбалык турмушун мүнөздөгөн табылгалары Кыргыз мамлекеттик тарых музейинен көрүнүктүү орун алган. Ал 60тай илимий макалалардын автору.