КЛЕРМОН-ФЕРРАН
КЛЕРМО́Н-ФЕРРА́Н – Франциянын борб. бөлүгүндөгү шаар. Овернь регионунун борбору. Пюиде-Дом департаментинин адм. борбору. Борб. массивдин чегинде, Алье д-нын (Луаранын куймасы) өрөөнүндө, 1465 м бийикте жайгашкан. Калкы 137,7 миң (2008; шаар айланасы м-н 400
миң). Маанилүү жол тоому. Алгач грек тарыхчысы Страбон тарабынан Немоссос деп эскерилет. Б. з. ч. 1-к-дын ортосунан Рим бийлигинин астында, 5-к-да епископтуктун борбору болгон. 507-жылдан Вестгот королдугунун, 6-к-дын ортосунан Франк мамлекетинин курамына кирген. 1630-ж. кошуна Монферран ш. м-н кошулуп (1731-ж. толугу м-н), азыркы атында. Эски Клермондо готика ж-а ренессанс стилиндеги турак жайлар сакталган. Роман стилиндеги Нотр-Дам-дю-Пор базиликасы (11–12-к.) Бүткүл дүйнөлүк мурастын тизмесине киргизилген. К.-Ф. – Франциядагы илим м-н билимдин ири борбору. Резина-тех. ө. ж. өнүккөн (шаарда «Michelin» концернинин штаб-квартирасы жайгашкан). Металл иштетүү, пластмасса өндүрүү, тамак-аш, кагаз, полиграфия, фармацевтика,
текстиль ө. ж. ишканалары иштейт. Ун-ттер, ин-ттар, соода жогорку ж-а улуттук салык мектептери, муниципалдык ж-а калк китепканалары (1902; Франциядагы эң ири), музейлер ж. б. бар. Жыл сайын кыска метраждуу фильмдердин, жаз (1988-жылдан) ж-а заманбап музыкалардын эл аралык фестивалдары, спорттук ар түрдүү мелдештер өткөрүлүп турат. Шаарга жакын Руайя бальнеол. курорту, шаардан
15 км батышта «Вулкания» жанартоо паркы (аянты 57 га), шаар айланасында байыркы Рим доорунун көптөгөн эстеликтери жайгашкан.
Р. Карачалова.