КИНО ТАРТЫЛУУЧУ ПАВИЛЬОН

КИНО́ ТАРТЫЛУУЧУ ПАВИЛЬО́Н – ичине кино тартуу үчүн атайын курулган жана жасал­галанган имарат. Ал – киностудиянын негизги өндүрүштүк бөлүгү. Анын акустикасы үндү таза жазууга мүмкүнчүлүк бериши зарыл. Кино тартылуучу павильон айнектери жок, ар кандай конструкциялардан тургузулуп, капталына жана төбөсүнө үн өткөрбөс материал менен капталат. Имараттын кино тар­тылуучу бөлмөсүнүн төбөсүнө декорацияны, жа­рык берүүчү аппаратураларды бекитүүчү меха­низмдер орнотулат. Павильон кичине (18x24 м²), орточо (21x30 м²), чоң (30x36 м²) жана өтө чоң (36x48 м²) болуп курулуп, алардын пайдалуу аянттары 150–14000 м² жана бийиктиги 6–25 мге жетет. Каалгалары да үн өткөрбөй тургандай жасалат. Ичинде ар кандай көрүнүштөрдү (жам­гыр, суу ташкыны жана башклар) жасоо үчүн суу жүргүч тармак, канализация, суу бассейндери курулат.