КАРЫМШАКОВ Абдыкасым
КАРЫМШАКОВ Абдыкасым [27. 04.1909 (айрым маалыматтарда 1912- же 1913-жыл деп берилет), Россия империясы, Түркстан генерал-губернаторлугу, Жети-Суу облусу, Пржевальск уезди, (азыркы Ысык-Көл облусу, Түп району)
Күрмөнтү кыштагы – 06. 08. 1997, ошол эле жер)] – Даңк орденинин толук кавалери, учкуч-аткыч. Мектепте 7-классты аяктагандан кийин Самарканд шаарындагы (Өзбек ССРи) механиктер мектебин аяктаган. 1941-жылы сентябрь айында өз ыктыяры менен Пржевальск шаардык аскер комиссариатына кайрылып, Ленинград шаарындагы учкуч-техникалык мектепти окуп, аба-аткычы адистиигне ээ болгон. Улуу Ата Мекендик согушта (1941–1945) Түштүк, 4-, 1-Украин жана Беларусь фронтторунда салгылашып, Таганрог, Мелитополь, Жанкой, Севастополь үчүн болгон уруштарга катышкан. Витебск, Борисов шаарларын бошотууга, Сандомир плацдармын ээлөөгө, Кёнигсберг шаарын алууга, Чыгыш Пруссияны фашисттерден тазалоого катышкан. Крым үчүн салгылаштагы эрдиги үчүн 27. 09. 1944-жылы 3-даражадагы (№ 125396), Чыгыш Пруссия операциясына катышканы үчүн 19. 03. 1945-жылы 2- (№ 9967) жана 29. 06. 1945-жылы 1-даражадагы (№ 1807) Даңк ордендерине татыктуу болгон. Согуш убагында жалпы 227 согуштук учуш жасап, 52 аба согушуна катышкан жана жеке өзү душмандын 3, жолдоштору менен 4 самолётторун атып түшүргөн. Кызыл Туу, Кызыл Жылдыз, 1-даражадагы Ата Мекендик согуш ордендери ж. б. медалдар менен сыйланган. Түп жана Күрмөнтү айылдарындагы бирден көчө анын ысмы менен аталат.
Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.