КАРИМОВ Ислам Абдуганиевич
КАРИМОВ Ислам Абдуганиевич (30. 1. 1938-жылы туулган, Өзбекстан, Самарканд шаары -- 2. 09. 2016 Ташкент) –
Өзбекстан мамлекеттик ж-а саясий ишмери; Өзбекстан президенти, Өзбекстан ИА академиги (1994), Өзбекстан Эл баатыры (1994). О. Азия политехника институтун (1960), Ташкент айыл чарба институтун (1967) бүткөн. 1960–61-жылдарда «Ташкент айыл чарба машиналары» заводунда мастердин жардамчысы, улук мастер, технолог, 1961–66-жылдарда Чкалов атындагы Ташкент авиация өндүрүштүк бирикмесинде инженер, жетектөөчү инженер, конструктор, 1966–83-жылдарда Өзбекстан Мамлекеттик пландоо комитетинин башкы адиси, бөлүм башчысы, төраганын 1-орун басары, 1983–86-жылдарда Өзбекстан финансы министри, 1986-жылы Министрлер Советинин төрагасынын орун басары, Мамлекеттик пландоо комитетинин төрагасы. 1986–89-жылдарда Өзбекстан КП Кашка-Дарыя обкомунун 1-секретары, 1989–91-жылдарда Өзбекстан КП БКнын 1-секретары, 1990- жылдан Өзбекстан Президенти ж-а Министрлер кабинетинин төрагасы. 1995-жылы 25-мартта Бүткүл элдик референдумдун чечими м-н Каримовдун президенттик ыйгарым укугу 2000-жылга чейин узартылган. 2000-, 2007-жылдарда Бүткүл элдик шайлоодо Каримов Өзбекстан Республикасынын Президенти болуп кайрадан шайланган. 2002-жылы референдумдун негизинде президенттик ыйгарым укук 5 жылдан 7 жылга чейин узартылган. Эмгек Кызыл Туу, Эл достугу, Амир Темир ордендери м-н сыйланган.