КАРА КУРТ
КАРА КУРТ (Latrodectus tredecimguttatus) – уулуу жөргөмүш. Жетилген ургаачысы кара түстө. Узундугу 10–20 мм. Эркегинин (узундугу 4–7 мм ) ж-а жетиле элек ургаачысынын курсагында кызыл тактары бар. Күндүз да, түнкүсүн да жакшы көрөт. Кара курт Түштүк Европа, Батыш Азия, Түндүк Африкада, Борбордук Азиянын чөлдөрү м-н тоо этектеринде таралган. Чымын-чиркей м-н азыктанат. Жерге уя салып, тегерете тор м-н чырмайт. Уруктандыргандан кийин эркеги өлөт. Ал эми ургаачысы күзүндө жумуртка туугандан кийин өлөт. Жумурткасы (1200–2000дей) желе пиллада кыштап, жазында андан жаш жөргөмүш чыгат. 6 жолу түлөп, жайында жетилет. Уулуу бездери баш-көкүрөгүндө жайгашкан. Кишини ургаачысы чакса, өтө коркунучтуу, чаккан жер катуу ооруйт, кара терге түшүп, эти көгөрөт, тырышат, деми кыстыгат, көбүрөөк ууланса, өлүмгө дуушар кылат.