КАРА-СУУ КВАРЦ КУМУ КЕНИ

КАРА-СУУ КВАРЦ КУМУ КЕНИ Баткен облусунун Лейлек районунда, Исфана шаарынан 5 км түндүк-чыгышта, деңиз деңгээлинен 1147–1355 м бийик­те. 1993–94-жылдарда Түштүк Кыргыз геологиялык экспедициясы чалгындаган. Кен аймагы палеозой, палеоген, төртүнчүлүк системаларынын карбонат-терриген катмарларынан турат. Кварц куму палеоген­деги сузак катмарчасы м-н байланышып, үч кабатка бөлүнгөн. Кумдун орточо калыңдыгы 25,05 м. Кум ылгоодон кийин айнек идиш, бөтөлкө, изолятор, түтүкчө, такта айнек жа­соого ж-а айнек кебезин өндүрүүгө жарамдуу. Запасы В категориясы боюнча 1494 миң т, С₁ – 5380 миң т.