КАПТАЖ
КАПТА́Ж (лат. captage – кармайм, тосом) – жер астындагы суу, нефть ж-а газды жер бетине чыгаруу, пайдалануу үчүн жүргүзүлгөн инженердик-техникалык иш-чаралар комплекси. Каптаж курулмаларынын эң байыркы түрлөрүнүн бири – кяриз (кыртыш суусун жер бетине чыгарат) Түштүк Чыгыш Азияда (анын ичинде Борбордук Азияда) көп колдонулган. Азыркы каптаж курулушу жердин гидрогеологиялык шартына, суунун курамына ж-а запасына карата ар кандай типте ж-а конструкцияда курулат. Каптаждын эң жөнөкөй түрү жер астынан суу чыгаруучу шахталык кудук. Кудук бекем болсун үчүн капталдарына таш, кыш тизилет. Каптаждын эң көп колдонулган түрү жалгыздан ж-а топтоштурулуп бургуланган көзөнөк болуп эсептелет. Мындай каптаждар 2 км тереңдиктеги сууларды жер бетине чыгарат. Пайдалануу ыгына жараша фонтандык, компрессордуу, насостуу, бургуланган көзөнөктүү каптажга айырмаланат. Көбүнчө сугат ишинде ж-а мал сугарууда пайдаланылат.